تعرضت سحر الإبراشي أرملة المرحوم الإعلامي وائل الإبراشي، لمحاولة اعتداء من إحدى السيدات مستخدمة سلاح أبيض في منطقة 6 أكتوبر.
أرملة الإبراشي بعد محاولة سيدة قتلها
وانتقلت أون مصر إلى منزل الراحل وائل الإبراشي، والتقت مع سحر الإبراشي لمعرفة تفاصيل تعرضها لمحاولة القتل من قِبل إحدى السيدات بسلاح أبيض داخل فيلًا الراحل وائل الإبراشي.
وقالت أرملة الراحل وائل الابراشي في حديثها لـ أون مصر: أنا كنت قاعدة أنا ووالدتي الصبح حوالي الساعة 11 ونص، وتفاجئنا ان الباب بيخبط بطريقة هيستريه، فـ راحت أمي الأول تفتح الباب لقيت واحدة على الباب، بتقولها فين مدام سحر، سألتها أمي: انتي مين، قالتها خليها تطلع وبتتكلم بأسلوب حاد.
وأضافت في حديثها لـ أون مصر، فأنا طلعت سألتها مين حضرتك، ردت عليا إنتي مش عارفاني، وكانت بتخبط وبتقول افتحوا يـ إما هطلبلكم البوليس، وهعمل شوشرة وانتوا مش قدي، فـ لما فتحنا الباب كان في كنبة راحت قعدت عليها، وقالتلي هاا إنتي لسه مش عارفاني، رديت عليها قولتلها لا والله اعذريني.
وأكملت، راحت السيدة دي قلعت نظارة الشمس وقالتلي ها برودا لسه لحد دلوقتي مش فاكراني، قولتلها لا والله، وادخلي في الموضوع، وقعدت تقول كلام مفيش حد يصدقه.
وتابعت: قالت إنتي متاكدة ان جوزك مات، قولتلها استغفر الله العظيم يارب، ده أنا كنت معاه طول الأيام وأنا اللي دفنته بإيدي، قالتلي لا لا، ده كذاب ده هو كان مواعدني بالجواز وأنا من كام سنة وأنا على علاقة بيه.
وأردفت: قولتلتها طب حضرتك عايزه ايه، طبعا كل ده وأنا عايزه اطلب سكيورتي بتاع الكمبوند عشان ييجي، وقاعدة تقول احترموا نفسكوا، وانا هنتقم منك انتي والبنت وهقتلك بنتك، رديت أمي عليها قالت لها اوعي تجيب سيرة البنت.
وأضافت: جات قالت لأمي احترمي نفسك ده انا هطلب لكم البوليس، قولتلها اهدي وكلميني أنا، وكل ده وإحنا مش عارفيين هي مخبية أيه وأي كلام قاعدة تقوله وأنا كنت شغالة معاه في برنامج العاشرة، فأنا تواصلت مع الزملاء اللي كانوا شغاليين معاه وقولتلهم تعرفوا دي قالوا ولا عمرنا شفناها.
وأكملت: طبعا جه أمن الكومباوند، وطلبت أنا النجدة، والحظ أن في أحد الأشخاص شاهدها وهي بترمي كيس، راح جاب أمين الشرطة، وقالهي رمت الكيس ده بيفتحوا الكيس لقوا جواه سكين.
ألقت الأجهزة الأمنية بقسم شرطة السادس من أكتوبر، القبض على المتهمة بالاعتداء على سحر الإبراشي أرملة الإعلامي الراحل وائل الإبراشي باستخدام سلاح أبيض سكين، داخل مسكنها بمدينة 6 أكتوبر بالجيزة.
