كتبت: أميمة أحمد
أعلن إيهاب صالح مدير أعمال المطربة كارمن سليمان ومدير أعمال الفنانة شيرين عبد الوهاب سابقًا، عن اعتزاله مهنة إدارة الأعمال وذلك بعد اعتذاره عن إدارة أعمال كارمن سليمان.
وكتب إيهاب صالح تغريدة عبر حسابه الشخصي على موقع التغريدات إكس، قائلًا: “التغريدة دي بقى عني أنا شخصيًا وعن اللي كنت بمر بي ونفسيتي وشوية حاجات كده قررت إني أغيرها في حياتي و أولوياتي”.
وأضاف: “كنت بفكر أكتبها في صيغة بيان لكن مش عارف الصيغة اللي تحت دي تعتبر إيه، بعبر عن نفسي واحساسي يمكن براحتي شوية، ملهاش علاقة بالنجوم اللي اشتغلت معاهم”.
وتابع: “الفترة اللي فاتت كنت بمر بفترة مش لطيفة خالص على المستوى النفسي والمعنوي وبعاني صحيًا وأرق في نومي وحاجات كتير كده مش لطيفة خالص و ده عكس طبيعتي تمامًا، وسألت نفسي أخرج من الحفرة السودة دي إزاي، سألت نفسي هي طالبة إيه عشان أكمل بنفس طاقتي اللي متعود عليها؟”.
وأكمل: “بعد تفكير وإعادة ترتيب لأولوياتي قررت إني أخد كام قرار مهم وضروري، أولهم إن شغلانة إدارة أعمال الفنانين دي مش ملعبي أو المفهوم بتاع الـ Management Artist في الوطن العربي غير متناسب مع طموحي وفكري جو حجز حفلات، أفراح وإعلانات وتاخد نسبة من ده وشكرًا على كده وكل من هب ودب يجود ويعمل فيها صانع نجوم عشان النجم اللي معاه “بينحت” وشغال على كاتالوج بستايل أغاني 2003 وبتشغلوا إليڤ حلو تبقى الليلة متعشية كدة وفل قوي مش إدارة اعمال خالص”.
وأوضح: “دي إدارة حجوزات وشغل سكرتارية من الآخر غلطة من الغلطات اللي بعملها كتير في حياتي إني أكون فاكر إني ممكن أقدم جديد في ملعب متهالك خايف من التغيير وبيقنع نفسه انه لعيب في ملعبه ومجاش زيه”.
واستطرد: “أنت مش شايف خالص إن ساحة المزيكا اتغيرت عالميًا؟ كل همك تعمل لسه ستاياليا أو مقسوم؟ الحمد لله أنا حد بعتبر نفسي بعد 20 سنة اعالم أن ليا وضع وحجم معين ومش حابب أهز ده قدام نفسي خالص بأي شكل وبكل ثقة أقدر أقول إني فاهم ودن اللي بيسمع ومواكب طول السنين دي نوعًا ما، ربنا كرمني الحمد لله وفعلًا اشتغلت مع نجوم مفيش جدال أبداً على قيمة فنهم وبحبهم وبحترمهم وبتبسط بنجاحهم حتى لو أنا مش معاهم وبحمد ربنا جدًا على نعمة كلمة اللي في وقت كلنا بنجري ورا كل جنية عشان أكل العيش وعيالنا وصعب جداً تقول قدام شوية فلوس حلوة كلمة ال دي كانت تجربة لطيفة بالنسبالي وكسبت فيها ناس وخبرة التي لا تقدر بثمن لكن مش حابب أكررها و لو في يوم هعملها تاني يبقى أعملها بمفهومها الصح اللي يتناسب مع قناعتي، دماغي و اللي يستاهل وجريء يخرج عادي من ال zone comfort بتاعه”.
لمتابعة مزيد من الأخبار اضغط هناااا
تابعنا من خلال صفحتنا على الفيس بوك من هناااااااا
واستكمل: “القرار التاني إني أكمل مشواري في عشقي الأساسي الراديو، بيتي، نجوم إف إم، أكمل مسيرة أهي بقالها 20 سنة من بدايات نجوم إف إم ودايمًا أقبل التحدي والتغييرات وأكون السباق في التجديد وأقف جنب الجيل اللي طالع وبعد اللي طالع كمان”.
وأردف: “لسه مش هستسلم إني أكون دقة قديمة وافضل أفاجئكم، فيا شوية نفس حلوين لسع إن شاء لله، القرار الثالث إني أنجح في تحدي أنا مبسوط بي فوق الوصف و حابب قوي ادخل في عشان عشقي بعد الراديو و المزيكا أكيد الكورة زي 90 ٪ من الشعب المصري”.
وأشار: “أنا بقالي شهور حاليًا جزء من إدارة نادي بيراميدز وماسك إدارة التفاعل الاجتماعي وشغال على شوية حاجات مختلفة تجمع بين شغلي في العالم والشركات العالمية في مجال التواصل الاجتماعي مع عشقي للكورة هتشوف النور قريب قوي إن شاء لله حابب عيلتي الجديدة في النادي وفريق عمل خلف الكواليس اكتر من محترف ومحترم، بيئة شغل صحية تقدر تخليك تنتج وتنجح بسهولة وده طبعًا بعد توفيق ربنا”.
واختتم: “شكرًا جدًا من كل قلبي لكل الناس اللي وقفت في ضهري طول السنين دي، دعمتني، وثقت فيا واستحملتني عيلتي، اداراتي، كل اللي علموني، صحابي وطبعا الجمهور اللي من اول يوم داعم كبير جدا ليا. من بائع اجهزة ترجمة وتخبيط على الشقق وتنطيط من منطقة لمنطقة سنة ٩٦ ل الحمدلله أكبر نعمة وفضل من عند ربنا المكان اللي أنا في دلوقتي، قول لنفسك دايمًا إن كل يوم في حياتك العملية هو أول يوم، اوعى تريح أو تفقد الشغف”.
