كشفت المحامية نهاد أبو القمصان عن رأيها في مسلسل “حالة خاصة” والذي تدور أحداثه حول شاب مصاب بالتوحد يعمل في مكتب محاماة تمتلكه الفنانة غادة عادل.
قالت نهاد أبو القمصان في مقطع فيديو على حسابها بمنصة تيك توك : “جميل أن يكون في مسلسل بيتكلم عن وجود شاب عنده حالة خاصة بس المكتب دة عايز يتشمع بكل المحاميين اللي فيه، يعني اولا ازاي نجيب صاحبة القضية ونقعدها مع كل المحاميين ومنهم المحاميين اللي تحت التمرين ونقولها قولي كل أسرارك قدام الكل ونقولها هما دول اللي هيحلولك القضية دة ضد مهنة المحاماة تماماً ، مش في حاجة اسمها خصوصية ازاي اجيب موكل يتكلم عن أسراره قدام شباب لسة بيتعلموا ومتعينوش في المكتب ودة انتهاك شديد لقيم واخلاق مهنة المحاماة”.
وتابعت: “ثانيا خلع ايه اللي بيعملوله تحقيق، 6 بيحققوا في قضية خلع ويصوروا جوز الست ويقولولها هاتي كشف طبي، الكلام دة ممكن يكون بيطبق في انجلترا اللي فيها اقتسام للثروة فكل واحد بيثبت أن مش هو سبب الطلاق لكن الخلع عندنا الست بتتنازل عن أي حاجة ومش بنقول أسباب اصلا أما التحقيقات دي في الطلاق للضرر”.
وأضافت: “فالمسلسل فيه مشكلة من ناحية اخلاقيات المهنة ومن ناحية الموضوعات المطروحة فهاتوا محامي يراجع المسلسل”.
وأردفت : “كمان الجناية اللي المتهم ممكن يأخذ فيها اعدام ولسة بنتناقش فيها وحد يديها برشامة فيها الحل قبل ما تترافع وتقولولي دي أكبر محامية في مصر وهي الصبح بتقول للمحاميين انتوا أكبر عقول واكبر محاميين ومش عارفين توصلوا لحل”.
واستكملت: “وصاحبة المكتب قعدة مع ال6 متدربين اللي لسة بتختبرهم مش حتى دول تحت التمرين والست افراد معاهم قضية واحدة، ولا المحامي المتحرش هل في محامي ممكن يتجرأ على استاذته ويتكلم معاها بالطريقة دي”.
وشددت : “حرام تدمروا ثقافة المجتمع القانونية دة احنا بنقعد سنين نبني الوعي القانوني وكمان موكلة تيجي لمحامية تقولها أنا هربانة من البوليس فتكلم المباحث تسلمها هي فين نقابة المحاميين من الكلام دة”.
واختتمت حديثها قائلة “أنا اتفرجت على 4 حلقات وقلبي مش جايبني دة مفيش منظومة اخلاق ولا قواعد مهنية ولا قانون”.
يذكر ان مسلسل “حالة خاصة” بطولة طه دسوقى، غادة عادل، أحمد طارق، هاجر السرّاج، حسن أبو الروس، وئام مجدى، أحمد الأزعر، على السباعى، لينا إيهاب، الطفل آدم وهدان، أدهم النحاس ، تأليف مهاب طارق وإخراج عبد العزيز النجار وإنتاج طارق الجنايني.
