كتبت: نجلاء علاء الدين
أطلقت الفنانة المعتزلة ميار الببلاوي، عددا من التصريحات النارية، بشأن شهادتها في قضية تعذيب الفنانة وفاء مكي للخادمة، وأكدت على عدم براءتها من هذه القضية، وأن الطب الشرعي أثبت إدانتها، وذلك من خلال لقائها في برنامج “العرافة” المذاع عبر شاشة قناة “النهار” وقناة “المحور”، مع الإعلامية بسمة وهبة.
وقالت ميار الببلاوي: “في الوقت اللي اتسجنت وفاء مكي مكنش بإيدي أي حاجة لا كنت ملك نفسي ولا كنت موجودة في مصر ولا كنت أقدر أوصلها أصلا وكان فيه تضارب بالأقوال أنا مش فهماه”.
ميار الببلاوي: مقعدتش مع هند عاكف ومقولتش إن معايا دليل براءة وفاء مكي
وتابعت:”وفاء مكي مش بريئة وملهاش أي علاقة بالبراءة، أنا مقعدتش مع هند عاكف خالص ومحصلش أي عياط ولا صح إني قولتلها معايا دليل براءة وفاء مكي، ولكن أنا بكيت لما لقيت وفاء بتستغيث علشان هي مش لاقية تاكل ولا تأكل ابنها، وقلت سيبوها في حالها”.
ميار الببلاوي: الطب الشرعي أقر أن الخادمة معندهاش أي مرض جلدي
وسردت ميار الببلاوي تفاصيل القصة قائلة: “القصة بالظبط إن واحدة جاتلي وجابت ليا شغالات أنا كنت طلباهم ورايحة فرح بنت خالتي وكنت محتجاهم لإن ابني رضيع لسه، ولما شوفتهم لقيت واحدة من البنتين شعرها محلوق وكانت متضايقة نفسيا ولما سألتها ليه كده البنت التانية جاوبت وقالت الأستاذة وفاء قالت إن عندها قراع وحلقت لها شعرها فقلت لها عندها قراع وجيباها لإبني يلا امشوا من هنا”.
وأكملت: “من ضمن التعذيب اللي البنت الخادمة اتعرضت له إن وفاء مكي كانت بتحلق لها شعرها وتحرقها في دماغها وده الكلام اللي اتقال، وده ينفي برائتها..والطب الشرعي أقر أن الخادمة معندهاش أي مرض جلدي وبالتالي وفاء مكي متهمة ومش بريئة”.
ميار الببلاوي: الطب الشرعي حسم إدانة وفاء مكي في تعذيب الخادمة
وأوضحت: “وفاء مكي وقت القضية كانت بتصور مسلسل مع نجوم كبار وشهدوا معاها ولكن الطب الشرعي حسم القضية بإدانتها بتعذيب الخادمة”.
وأتمت حديثها قائلة: “رسالة التهديد دي كانت لعبة عملها جوزي لإنه مش عايزني أروح محاكم وافتح علينا فتحات وبعد لما رجعنا من سوريا قال لي بطلي هبل وأنا اللي هددتك علشان تبعدي عن الوش، وسألت المحامي وفارس حماد وقالولي كلامك مش هيقدم ولا هيأخر”.
