كتبت: نجلاء علاء الدين
كشف الفنان ونقيب المهن الموسيقية مصطفى كامل، العديد من الأسرار الخفية حول وفاة الموسيقار حلمي بكر، وذلك أثناء لقائه مع الإعلامية بسمة وهبة في برنامج “العرافة” المذاع عبر شاشة قناة “النهار”.
وأكد مصطفى كامل، أنه لم يسع للتواصل مع نجل حلمي بكر، كما أوضح أنه كان موجود في مصر قبل وفاة والده ولم يذهب لزيارته، وأوضح أن الموسيقار حلمي بكر تهاون في حق نفسه وأنه كان يعتبر ابنته الصغيرة نقطة ضعف له.
مصطفى كامل: رفضت الحديث مع نجل حلمي بكر
وقال مصطفى كامل: “أنا لم اسعي للوصول لـ هشام هو اللي دور عليا، أنا كلمتني الفنانة نادية مصطفي وكنت بقولها شوفي عايز أي وعرفيني، وفي أيامه الأخيرة هي بعتالي رسائل صوتيه قاتلة مكانها الوحيد القانون نصها الحقوا الأستاذ حلمي، وكل حاجة نادية سمعتها لابنه وهي اللي قالتلي أنه عايز يكلمني وأنا قولتله يكلمني ليه وأنا قولتلها ليه يا نادية عايزة تدمر حياتي وحياة ولادي”.
وتابع: “رفضت الحديث مع نجل حلمي بكر لأنه كان موجود في مصر ومسألش على أبوه، وهو لما كلمني قولتله أنت أولى بابوك من أي حد، وقالي انت واخد عني فكرة غلط وأنا عايز أقعد اتلكم معاك”.
مصطفى كامل: حلمي بكر كان بيرجع لمراته عشان بنته
وأضاف: “قولت لابن حلمي بكر من فضلك انزل لابوك بسرعة عشان كلنا نبقى في ظهرك.. وأنا بعتله رقم مرتضي منصور عشان يكون مع حد قانوني”.
وأكمل: “حلمي بكر كان بيرجع لمراته عشان بنته، وأنا كنت بيص في عينه عرفت أن بنته هي نقطة ضعفه، ومكنتش بحس أنه بيتكلم عن بنته، وكان في ناس كتير بتلومه على الأساس ده، وكان بيحب يحكي عنها كتير وهي كانت هدفه في الحياة، اللي ملقهوش مع الستات حاول يلاقي مع بنته الصغيرة”.
وأتم: “ربنا يعلم مين اكتر حد حزين على حلمي بكر لحد دلوقتي، وأنا واخد عهد على نفسي من 6 شهور، إني متدخلش في أي أمر يخص الأستاذ حلمي عشان تعبت من اندفاعي من حبي لي، وبعدين هو تهاون في حق نفسه”.
وفاة حلمي بكر
وكان قد رحل عن عالمنا الموسيقار حلمي بكر في يوم 1 من شهر مارس الجاري عن عمر يناهز الـ 86 عاماً بعد صراع طويل مع المرض، وتدهورت حالته الصحية في أيامه الأخيرة، وتوفي بعد ساعات قليلة من دخول غرفة العناية المركزة بعد تأزم حالته الصحية.
وطلب هشام حلمي بكر حينها، عدم دفن جثمان والده، حتى مجئ إلى مصر، وفوض المستشار مرتضى منصور بهذا الأمر، وبالفعل تم وضع الجثمان داخل أحد الثلاجات وتم دفنه بالأمس، ونشبت العديد من المشاجرات بين أسرة الراحل حلمي بكر وبين أرملته سماح القرشي، أثناء نقل الجثمان من محافظة الشرقية إلى القاهرة.
