حل الفنان والمونولجيست عادل الفار ضيفاً مع الإعلامي عمرو الليثي في برنامج ” واحد من الناس” علي قناة الحياة، وتحدث عن تفاصيل معاناته مع المرض وفقدان ابنه الوحيد شادي.
غيبوبة كبد تودع عادل الفار العناية المركزة
وقال عادل الفار خلال لقائه ببرنامج ” واحد من الناس” مع الإعلامي عمرو الليثي: “سنة 2021 جاتلي غيبوبة كبد واتحجزت في العناية المركزة، فجأة لقيت نفسي مبجمعش الكلام وتايه لغاية لما بنتي ومراتي صمموا إني أروح المستشفى ولما روحت في غيبوبة خدوني المستشفى وقعدت أسبوعين محجوز وعملولي تحاليل وأشعات وعملت عملية جراحية”.
أضاف الفار: “خلال فترة مرضي ابني شادي عادل الفار كان بيطلب من الجمهور يدعيلي بالشفاء، وفي يوم 10 فبراير بعد سنة من مرضي انتقل إلى رحمة الله وتوفى وبقيت أنا اللي بدعي له بالرحمة وبقرأ له الفاتحة وبدعي للناس يدعوله”.
استقبلت خبر وفاة ابني وانا على القهوة
تابع: ” خبر وفاة ابني شادي كان مؤلم جدا، هو تعب أوي وأنا كنت قاعد في القهوة مع أصحابي ومراتي خدته وراحت المستشفى وأنا كنت زعلان منه في الفترة دي ومتغاظ علشان مكنش بيسمع كلامي وبيشرب سجاير كتير”.
أردف عادل: ” والدته أخدته المستشفى فروحت علي المستشفى شوفته جاي من بعيد ومقعدينه على العجلة اللي بتمشي وكنت متضايق منه أوي وتاني يوم عرفت إنه مات وأنا مسلمتش عليه قبل ما يموت واتأثرت جدا لإنه كان حبيبي وغاوي فن”.
اختتم حديثه قائلاً: ” المستشفى اللي شادي ابني مات فيها، أنا كنت مقعد المساعد بتاعي معاه يشوف هو عايز إيه ويعملهوله وبعدين بلغني تاني يوم إنه مات، مش قادر أنسى صورته الأخيرة وهو متوفى وطول الوقت لما افتكره ببقى عايز أعيط لإنه ابني الوحيد، ومعنديش دلوقتي غير بنتي وهي اتجوزت وسافرت مع جوزها أمريكا”
