محمود حمدان لـ أون مصر: “حق عرب” في كل البيوت.. والعوضي له جماهيرية كبيرة

كتبت: نجلاء علاء الدين

حقق مسلسل “حق عرب” للنجم أحمد العوضي نجاحاً كبيراً، منذ بداية عرضه في السباق الرمضاني لعام 2024، حيث جذب العمل العديد من المشاهدين من مختلف الفئات، وأصبح حديث الشارع المصري.

وأجرى موقع “أون مصر” حوار مع المؤلف محمود حمدان، للكشف عن كواليس التحضير للمسلسل، كما تحدث حمدان عن اللمسات الخاصة التي وضعها داخل العمل من أجل توصيل الفكرة والمضمون للجمهور، كما تحدث عن تجربة تعاونه مع نجوم المسلسل.

هل توقعت نجاح مسلسل “حق عرب”؟ وكيف رأيت تفاعل الجمهور مع المسلسل في الشارع؟

-“سعيد بردود الأفعال التي تصلني على مسلسل (حق عرب) من الشارع على القهاوي، الناس متكاتفة وبتتفرج على المسلسل، واللي بشوفه على مواقع التواصل الإجتماعي ان المسلسل بقى موجود في كل البيوت كل الناس بتتفرج وحابين المسلسل جداً، والأهالي بدأت تاخد بالها أن ده مسلسل محترم مناسب للأسرة المصرية، الناس مبسوطة، وكل ممثل عمل اللي عليه عشان يبسط المشاهد”.

ما هو الحلم الذي حققته من خلال مسلسل حق عرب؟

“كان عندي حلم إني اعمل مسلسل من 30 حلقة كل حلقة المشاهد مبسوط بيها ومستني الحلقة اللي بعدها، وبالتالي ده يخلي أسمي عند المشاهد كبير ويثق فيا كمؤلف لما يشوف اسمي على أي عمل”.

كلمنا عن بداية تحضيرك لمسلسل حق عرب؟ وهل تخوفت من تقديم العوضي للبطولة؟

-“أحمد العوضي نجم كبير جداً ومحبوب في قلب الشارع، وله جماهيرية كبيرة، وهو عمل 4 مسلسلات قبل كدة وبالتالي دي البطولة الوحيدة اللي منفردة لـ العوضي، هو نجح قبل كده والمشكلة كانت عندي عشان أنجح نجاح أكبر من اللي هو عمله قبل كده، خاصة أن أحمد المرة دي هو بطل العمل لوحده ومعانا أبطال كبار بردو طبعا، بس هو إسمه مسلسل حق عرب، وبالتالي كان العبء كبير، وكان نفسي ننجح أضعاف، والحمدلله نجحنا جداً”.

اعتاد الجمهور على تقديم البطل الشعبي بدور بلطجي.. كيف حققت عكس ذلك في حق عرب؟

-“أنا ضد أن المسلسل الشعبي لازم يبقى البطل بلطجي، ولو جبت البلطجي هنتقده أو هيبقى عندي حاجة عايز اقولها من خلاله، بس مش هجيبه بكل الصفات السيئة وأبرزها، في الآخر احنا مجتمع شرقي، أنا عايز أقدم شيء أمي واختي والناس اللي في الشارع والجيران يتفرجوا عليه ويقولوا أنت مقدم حاجة محترمة، ميكونوش مكسوفين مني، أنا محبش كده، أحب أقدم عمل محترم، عشان يكونوا المشاهدين واثقين فيا ومتأكدين إني مش هقدم عمل ضد مبادئ وقيم المجتمع المصري، والحمدلله الناس لمست ده في مسلسلي اللي كان قبل (حق عرب) مسلسل (حدوتة منسية)، وإحنا مش بنستأذن عشان ندخل البيوت إحنا مش زي السينما الناس بتقطع تيكت وتدخل، لأن ده مسلسل بيتعرض على التلفزيون، يعني ايه طفل ممكن يشوف المسلسل ويتعلم حاجة مش كويسة مني ده شيء مش مقبول نهائي”.

بداية مسلسل “حق عرب” وحلم الثعبان.. تشبه قصة سيدنا موسي وفرعون فهل تم استنساخ هذا الجزء منها؟

-“قصة سيدنا موسى وفرعون بذرة المسلسل من نفس القصة، لأن النبوءة اللي جت لـ عبد ربه أنه لو خلف ولد هيقتله فلما عرف أنه جاب بنت ارتاح، ولكن اللي مش شبه القصة فكرة أن الأم تبدل أبنها ببنت تانية عشان تبعد الخطر عن ابنها ويكون قدام عينها بس مش في حضنها، من هنا بدأت الدراما، والحمدلله الناس كانت حباها ومنتظرة ايه هيحصل”.

قدمت في مسلسل “حق عرب” جزءًا عن الإدمان فما رسالتك به للجمهور؟

-“الجزء في المسلسل عن الإدمان أنا وأحمد العوضي كنا متفقين أن يكون عندنا أشياء تفيد الشارع المصري، مقدرش أقول إن مفيش عندنا حد بيشرب مخدرات، أنا لو قولت كده أكون بكدب، في ناس بتعمل ده وأنا كنت حابب أخلي الناس تشوف خطر الطريق ده عامل إزاي، لما يشوفوا شخص كان رياضي وبيدخل معارك مع أول وتاني حقنة وقع وأتكسر وخسر صحته، الناس بقت تنادي أنهم عايزين يجيبوا حقه، وهنا حسينا بالنجاح لما قدمنا رسالة بشكل غير مباشر، وأكيد في مليون واحد شافونا وإحنا بتقول ليهم ارجعوا من الطريق ده، احنا من أول ما فكرنا في الموضوع ده كان بغرض أننا نفيد المجتمع بشئ”.

هل ترى أن مسلسل “حق عرب” هو الحصان الأسود في دراما رمضان؟

-“مقدرش أقول إن مسلسل (حق عرب) هو الحصان الأسود في رمضان، أنا أحد صناع المسلسل فمقدرش أقول ده، بس حسب ردود الأفعال ده بيتقال، والحمدلله ده بيعمل عليا عبء كبير على الأعمال اللي هقدمها السنة الجاية وتحقق نفس النجاح، وزملائي في المسلسلات الأخرى مقدمين أشياء جميلة جداً، وفي أعمال كتير حلوة الصناعة بتستفيد”.

ما هي رسالتك للشركة المتحدة؟

-“عايز أشكر الشركة المتحدة، مقدمين مسلسلات جميلة، والمشرفين على هذه الأعمال كانوا مشغولين بأي مشكلة بتحصل، لأنهم عايزين يبسطوا المشاهد ويقدموا حاجة محترمة.

هل حقيقة تجد مقارنة بين “حق عرب” ومسلسل “جعفر العمدة”؟

-“مقدرش أقارن مسلسل (حق عرب) بمسلسل آخر، لأن المسلسل في منطقة معينة والمسلسلات اللي نجحت في السنين اللي فاتت في منطقة تانية، ولو الجمهور قارن مسلسل (حق عرب) بمسلسل (جعفر العمدة) فالجمهور بيشاور على العمل الناجح وده شئ يسعدني، أن الجمهور يقارن المسلسل بأي عمل آخر نجح نجاح كبير”.

كلمنا عن تحضيرك لنهاية مسلسل “حق عرب”؟ وهل هتفكر في تعديلها لو الجمهور توقعها؟

-“النهاية اتكتبت واتصورت وفركشنا تصوير، وان شاء الله تعجب المشاهدين، ولكن تم تعديل نهاية مسلسل (حق عرب) وأنا بكتب الحلقة الاخيرة الناس توقعت حاجة من ضمن الحاجات اللي هتحصل، فعدلت جزء عشان نبعد شوية”.

هل ننتظر جزءًا ثانيا من العمل أم ستكون النهاية بوفاة البطل؟

-“البطل ممكن يموت الله أعلم هنشوف، بس أنا محبش أقدم جزء تاني غير لو الجمهور طلب، لكن أنا مش بفضل ده لأني شايف إني هكون بستثمر النجاح وبمط القصة أكتر، فأنا شايف أقدم موضوع جديد أفضل من الأجزاء، إلا لو وردت فكرة في دماغي ممكن أعمل كده، ووارد بعد الموسم ألاقي فكرة تتعمل جزء تاني، بس لازم أكون واثق إني هقدم حلقات تعمل نجاح أكتر من الحلقات اللي اتعرضت، فلازم مقلش نجاح عن اللي حصل”.

كيف ترى تجربة التعاون مع نجوم مسلسل حق عرب؟ ومن الأكثر تميزاً؟

-“سعيد بالتعاون مع ممثلين كبار في مسلسل (حق عرب)، وكل الممثلين أبدعوا وأجتهدوا جداً وأنا كنت بشوف تعبهم بعيني، وكل واحد كان قد الأمانة وقدم الشخصية علي أكمل وجه، والنجوم الأكثر تميزاً الاستاذ رياض الخولي ووفاء عامر بيعزفوا سيمفونية رائعة وهما مبدعين، وحقهم إني أقول عليهم كده”.

ما رأيك في تجربة المسلسلات الأوف سيزون؟

“أنا بالنسبة ليا المسلسل هو مسلسل في أي وقت في رمضان أو الأوف سيزون، في رمضان بتكون نازل وسط 40 مسلسل ودي معركة كبيرة لازم تدخل تحسمها، لصالحك خلال شهر رمضان، ولكن أنا بتعامل مع المسلسلات الأوف سيزون كأنها مسلسلات رمضان”.

كلمنا عن تعاونك مع سوسن بدر في مسلسل “حدوتة منسية”؟

“فكرة مسلسل (حدوتة منسية) كانت بتراوضني بقالها سنتين ونص، لحد ما حصل التعاون مع شركة الإنتاج، والأستاذة سوسن بدر ممثلة جميلة جداً، وكل كرو المسلسل كان مميز، وكنت سعيد بالمسلسل وهو بيتعرض لأنه كان محقق ردود أفعال إيجابية، والحمدلله إني قدرت أقدم شئ ناجح للمشاهد”.

تحدثت في “حدوتة منسية” عن استئجار الأرحام دون تعمق.. لماذا لم تسلط عليها الضوء بشكل أكبر؟

-“احنا في المجتمع بنقلق من الحاجات اللي فيها تشكيك أو حاجة فيها شبه حرمانية، زي في مسلسل (حدوتة منسية) فكرة تأجير الأرحام، الجزء ده وأنا بكتبه كنت بفكر هروح للمطنقة دي إزاي، الحمدلله اتقدمت بشكل الجمهور استوعبه، واستئجار الأرحام منطقة خطر محظورة لأن الدين بيحرمها، بس في ناس بتكون مضطرة تعمل كده من كتر ما نفسها تخلف، وكان لازم نبروز الموضوع في المسلسل”.

تعاونت مع الزعيم في مسلسل “عوالم خفية”فما رسالتك له؟

“أكتر حاجة في حياتي كانت مفرحاني هي التعاون مع الاستاذ عادل إمام في مسلسل (عوالم خفيفة)، المسلسل بالنسبة ليا هو بداية الخير والنجاح والانفراجة ليا في الكتابة، والتعاون معه شئ عظيم، وأنا استفدت منه كتير جداً، أنا كنت بحاول أستغل كل وقت وأنا قاعد معاه، وهو ببزهق بسرعة ولكن بني آدم جميل أوي، وفي مشاهد أنا كنت كاتبها كان بيقعد معايا ويقولي برافو، وهو هيفضل في تاريخي ماهما عملت في مكان لوحده”.

من النجوم الذين لفتوا انتباهك في مسلسلات رمضان؟

-“في ممثلين كتير حلوين في رمضان 2024، محمد دياب هايل، محمد على رزق جميل، أكتر قصة مسلسل شدتني هو مسلسل (أشغال شقة، وأعلى نسبة مشاهدة) المخرجة ياسمين أحمد كامل برافو عاملة مسلسل حلو أوي، وسلمى أبو ضيف كانت حلوة أوي، مسلسل (العتاولة) حلو أحمد خالد موسى هايل، مسلسل (ألف ليلة وليلة) إسلام خيري وأنور عبد المغيث عاملين مسلسل محترم، مسلسل (الحشاشين) استاذ عبد الرحيم كمال كاتب رائع وكريم عبد العزيز ارفع له القبعة وهو أهم الممثلين المصريين وأحمد عيد عامل شخصية هايلة في الحشاشين”.

ما موقفك من تقديم عمل لك لم يحقق النجاح المتوقع؟

-“لو كتبت عمل وطلع عكس ما أنا متوقعه، مش هبقى عايز اتكلم عنه، حتى لو أنا كاتب المسلسل كويس ولكن طلع بشكل وحش لأسباب تانية، مش هكون حابب أتكلم عنه”.