كتبت: نجلاء علاء الدين
استنكر محمد عبدالله الأستاذ بكلية التربية الموسيقية مشهدًا في مسلسل “تيتا زوزو”، يقلل من خريجي كلية التربية الموسيقية.
وقال محمد عبدالله لـ “أون مصر”، إن المشهد إهانة لجميع الأساتذة في كلية التربية الموسيقية بجامعة حلوان ولجميع الطلاب، معنربا عن استيائه الشديد من مؤلف العمل بعدما وصف الموسيقيين بـ الآلاتية.
وتابع “أثناء مشاهدة أحد حلقات مسلسل تيتا زوزو وجدت مشهد حواري بين الأستاذة إسعاد يونس و الممثل نور محمود بيتكلمو عن تقدم حفيد اسعاد يونس إلي دخول كلية ودراسة الموسيقي، فوجئت بمشهد الممثل نور محمود “لا لا عايزين تدخلوا تربية موسيقية اللي بيخرجو منها آلالاتيه ” طبعاً وصف غير منضبط و غير مسئول انه يوصف التربية الموسيقيه بتخرج آلالاتيه إلي سوق العمل واحنا نرفض هذا الوصف”.
وأكمل: “كلية التربية الموسيقيه لا تخرج الآلاتيه نهائي بل تخرج عازفين و موسيقين ومبدعين ومنتجين للأغاني و ملحنين و مؤلفين موسيقي تصويرية، الرد التي ردت به الفنانة اسعاد يونس كان “هم موسيقين” وهذا وصف غير دقيق، كان من المفترض أن المؤلف لا يذكر اسم الكلية لأن الكلية بتسهم بالنهوض بالموسيقي في مصر و هي قلعة من قلاع الفن في مصر مثل الموسيقي العربية و كونڤتوار علي مستوي الأمه العربية”.
وأضاف: “اليوم جميع حفلات الدول العربية من خريجين كليات الموسيقي في مصر خريجين كلية التربية الموسيقية في بيشرفونا علي مستوي العالم، ميصحش يوصفهم بالألاتيه ميصحش أظهر التفكير الراجعي بأني أهينه أو أسخر منه وأسيب فرصة للطرف الاخر يصحح دا هذا مشهد مرفوض، كان من المفترض المؤلف يكتب حوار ارقي من كدة، كنا زمان بنقول علي الممثلين في الثلاثينات انهم مشخصاتي، الكلمة دي بتهين الممثل دلوقتي الكلمة دي اتنست ودلوقتي بنقول عليه ممثل”.
وأكمل: “زمان كان بيتقال علي الموسيقي أنه عشان بيعزف علي الاله فهو الالاتي، فهذا وصف غير صحيح هو عازف بيعزف علي الكمان بيعزف علي اله موسيقيه، نظرة رجعية كان يجب إلا تذكر، ثالثاً الموسيقي التصويرية في جميع الأفلام لا غني عنها نهائي، لأن لا يوجد مخرج يمكنه الاستغناء عن الموسيقي التصويريه في فيلمه المخرج بيتصل بالمؤلف الموسيقي ويطلب منه أنه يعمل موسيقي تصويريه خاصه بالفيلم لا يمكن خروج الفيلم دون موسيقي تصويرية، صناع السينما و المسلسلات لا يمكنهم الاستغناء عن الموسيقي التصويرية”.
وأردف:”مفيش مخرج يقدر يستغنى عن الموسيقى التصويرية، بعد ما بيخلص فيلمه بيكلم المؤلف الموسيقي ويوريله الفيلم ويقوله أنا عايز الموسيقى هنا وهنا ويحددله الأماكن،، ميقدرش يطلع الشغل من غير الموسيقى التصويرية، صناع افلام السينما لا يمكن يستغنو عن الموسيقى التصويرية، انما النهاردة ممكن الموسيقى بتاعتنا تطلع في حفلة موسيقيه من غير ما نحتاج أي ممثل أو مخرج حفله موسيقية للفنان عمر خيرت في قاعة من القاعات وغير مذاعه ومفيش كاميرات الموسيقين هتقعد وعمر خيرت هيقعد ويعملو الحفلة بتاعتهم والناس هتقعد وتستمتع، مش هنجيب ممثل يشرح الموسيقى ولا مخرج يوصف الموسيقى”.
وأوضح”الموسيقى قادرة على إظهار نفسها بنفسها، أنا بعتبر الموسيقى لا غنى عنها في كل الفنون النهاردة لما تكون بتعمل معرض تصوير أو عرض فنون جميلة بتحط في دماغك انك هتشغل موسيقى للناس اللي بتيجي تسمع ولما بتروح اي مكان بتلاقي الموسيقى، والموسيقى التصويرية مين اللي بيعملها هما الخرجين يعني لما بتتفرجي على فيلم سينما ويعجبك بتسمعي موسيقى تصويرية اللي بيعزف الموسيقى دي هما خرجين الكليات والمعاهد هما اللي شاركو في صناعة هذا العمل”.
وتابع:”أنا بستنكر ده وكل طلاب كلية الموسيقى والمعاهد بيستنكرو ده لأن تم إهانتهم وكده كل الناس اللي عايز تدخل الكلية بيتم إهانتهم وأي طالب خريج كلية وكبير وعايز يروح يخطب تم إهانته، عيب المفروض مكنوش يذكرو اسم الكلية خالص على الاقل يقولو موسيقي وهي تشرحله الموسيقى بيعمل كذا وكذا، دي مهنة مينفعش نسخر منها أو نتنمر عليها ومسمعناش الكلام ده على ممثل أو مخرج مفيش أي عمل فني سنمائي تم السخرية منه أو ممثل أو مخرج، إنما لا الموسيقين عادي جدا ده غلط نفسي أن كتاب القصة يسيبوا المفهوم القديم الرجعي ده، ويبقى في رقي في التعامل بره لما تشوفي حد في أوروبا واحد بجهاز موسيقى في الشارع بيتلمو حوليه وبيسقفو له وبياخد مقابل مادي”.
وأتم حديثه قائلا: “انتي ممكن في 3 شهور تعملي ممثل أو مطرب مجرد أن صوته حلو وتدربيه ويغني، إنما موسيقى وعازف أقل حاجة 10 سنين علشان تعمليه التدريب على الأله شئ صعب جدا وعايزة طول بال وصبر، وفي الاخر اللي انا عايز أقوله لازم نحترم بعض ومنسخرش من الكليات”.
أحداث مسلسل تيتا زوزو
تدور أحداث مسلسل “تيتا زوزو” في إطار درامي اجتماعي حول الجدة الأرملة زوزو التي كانت تعمل بالزراعة، وهي أم لأربعة أبناء وجدة لسبعة أطفال وأحفادها يعتبرونها مثلهم الأعلى وحين يقعون في أي مشكلة يلجأون لها وتحاول دائمًا التقرب منهم وتحب ما يفعلونه وتحاول تعلمه، ولكن تقع دائمًا في خلاف مع أبنائها لأنهم يرونها تربي الأحفاد بطريقة لا تتناسب مع العصر الحالي وفي كل حلقة تحاول حل مشكلة لواحد من أحفادها.
أبطال مسلسل تيتا زوزو
ويشارك في بطولة مسلسل “تيتا زوزو” كل من إسعاد يونس، إسلام إبراهيم، مصطفى غريب، إيناس كامل، محمد كيلاني، حمزة العيلي، نور محمود، عابد عناني ، وإيمان يوسف، وعدد من الأطفال،والعمل من تأليف محمد عبد العزيز وإخراج شيرين عادل.
