في مشهد مهيب..نجوم الفن يودعون جثمان الراحل تامر ضيائي تنفيذا لوصيته

كتبت: نجلاء علاء الدين

شيعت جنازة الفنان الراحل تامر ضيائي عصر اليوم، من مسجد السيدة نفيسة، وشهدت الجنازة تواجد عدد كبير من نجوم الوسط الفني، تنفيذا لوصيته، والذي أوصي به قبل وقت قليل من وفاته.

وحضر وقت تشييع الجثمان كل من أشرف زكي، كريم أبو زيد، لقاء سويدان، محمد على رزق، حمزة العيلى، كريم الحسيني، كريم أبو زيد، هشام إسماعيل، حسام داغر، منير مكرم، شريف إدريس، حسني شتا،فكرى صادق وابنه مراد فكري، أحمد التهامى، المخرج جمال عبد الناصر،  المؤلف أيمن سلامة، محمد مرزبان، أحمد صفوت، المخرج تامر كرم، حسني شتا، المخرج خالد جلال، نهي لطفي، ضياء عبد الخالق،

وصية الفنان الراحل تامر ضيائي

كتب الفنان الراحل تامر ضيائي وصيته قبل أشهر قليلة، وجاء نصه علي النحو التالي:  “بوست وصية.. هيفضل باين على صفحتي لحد ما أموت.. الحقيقة اللي كلنا عارفينها ومتأكدين منها إننا كلنا ربنا كاتب لنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة ووقتها طبعاً مش هعرف أقولها لحد. ودي وصيتي”.

وتابع: “صلاة الجنازة أهم من العزا وهي اللي كل ما العدد زاد كل ثوابي ما كان أكتر، فأرجوكم تصلوا عليا مش شرط تيجي العزا وياريت لو اتعمل في البيت أو مكان بسيط بفلوسه تطلعوا صدقة جارية أفضل”.

وأضاف: “من فضلكم لم يثبت أو يتفق عليه عمل ختمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللي هتقروا فيه جزء فضوا نفسكم واقعدوا ادعوا فيه، بلاش صدقة جارية تقليدية وسهلة ومش مستفاد بيها يعني المصاحف كتير في مصر أوي، وكل بيت فيه كتير فممكن نحط الفلوس في جامع بيتبني أو كرسى متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة”.

وأكمل: “دى نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا “وأبيضت عيناه من الحزن فهو كظيم”.

تامر ضيائي: ياريت تقعدوا معايا شوية بعد ما تدفنوني

وأستكمل::”أهم حاجة تاني هي الدعاء وبس والصدقة، من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية و تمشوا عشان تونسوني في ليلة زي دي، الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تانى”

وأردف: “اللي بيحبوني يدعولي كتير عشان لو مفيش حد يدعيلي ودي مهمة أوي أوي أوي عاوز الكل يسامحني على أي حاجهة عملتها فيه بقصد لو بدون قصد”.

واختتم: “اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عند الموت ويسّر طلوع روحي وهوّن عليّ سكراتي فإني أحب أن أرحل في هدوء وسكينة و طمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين”.

شريف إدريس يعلن عن الأنتهاء من استخراج تصريح الدفن

وأعلن الفنان شريف إدريس الانتهاء من استخرج تصريح الدفن وشهادة الوفاة للفنان تامر ضيائي، الذي رحل عن عالمنا أمس بعد تعرضه لمشاجرة مع إحدى أفراد الأمن بالمستشفي التي تتلقي فيها زوجته العلاج.

وكتب شريف إدريس على حسابه الرسمي عبر فيسبوك: ” الحمد لله تصريح الدفن وشهادة الوفاة خلصو، وفي انتظار الغسل الساعة 3، والتحرك إلى المسجد الساعة 4، وإن شاء الله صلاة الجنازة بعد صلاة العصر في مسجد السيدة نفيسة، وبعد كده التحرك على المدافن، الله يرحمك يا تامر، أرجو تكثيف الدعاء”.