فريدة سيف النصر لـ أون مصر: رفضت دور سترة العترة في البداية..والشخصية كانت من نصيب فنانة تانية

كتبت: نجلاء علاء الدين

كشفت النجمة فريدة سيف النصر، لموقع “أون مصر”، عن عدم حماسها في البداية للمشاركة في دور “سترة العترة” في مسلسل “العتاولة”، الذي عرض في السباق الرمضاني 2024، وأكدت أن الدور كان من نصيب فنانة أخري لكنها أعتذرت، كما أعربت فريدة عن سعادتها بردود الأفعال علي دورها في العمل.

وقالت فريدة سيف النصر: “مكنتش أعرف حاجة عن مسلسل (العتاولة) الدور مكنش بتاعي، كان خاص بزميلة تانية وربنا بعتهولي، وبعدين أعتذرت مكنش عندي حماس أوي، لكن بعد مناقشة قبلت الدور، وربنا لما بيبعتلي حاجة بتنجح، وأنا مكنتش أعرف حاجة كان معايا تلت أو أربع حلقات فقط”.

فريدة سيف النصر: رسمت عقد نفسية لـ شخصية سترة العترة من أجل إيجاد مبرر لجحودها

وتابعت فريدة سيف النصر: “أستعدت لتجسيد الشخصية من خلال رسم الشخصية وتخيل طريقة لبسها وشعرها وطريقة كلامها ومشيتها ونبرة صوتها، كل شخصية بيكون ليها ملامح خاصة بيها، وأنا بعمل خلفية جواء نفسي للشخصية بحط الحاجات المؤثرة، وهل كانت شغالة وهي صغيرة، بعمل ليها عقد نفسية رغم أنها مبتكونش موجودة أو مكتبوبة قدامي، بس عشان أكون عارفة هي جايبة الجحود والشر منين”.

وأكملت:”حتى لو مش معمول مشهد بده أنا بكون الحاجات دي جوايا، زي مسلسل (بدون ذكر أسماء) الريسة حطيت جواها الحنية والطيبة والغلب، وهي تخنت لأنها كانت بتاكل وده أثر علي نفسيتها، أستاذ وحيد حامد الله يرحمه ده خسرته كان بيوفقلي علي كل حاجة وتامر محسن، وبكون داخلة عارفة أحزان الشخصية ومشاكلها، وبتوفيق ربنا بيكون الغلاف الخارجي واضح”.

فريدة سيف النصر: حصدت نتيجة شغل 40 سنة بنجاح شخصية سترة العترة في “العتاولة” 

وأتمت فريدة سيف النصر حديثها قائلة: “فضل و عدل من ربنا والجمهور نجاح شخصية سترة العترة، أنا بحصد نتيجة شغل أكتر من أربعين سنة من وأنا عيلة صغيرة، أشتغلت مع أكبر مخرجين وأكبر أدوار وبطولات سينما وبطولات مسرح ده تعبي فعلا، الجمهور اللي أنا مربياه اللي قدي وفي سني اللي هو في الستينات، ولادهم بقي اللي هما قد ابني وولادي ولادهم الأحفاد، و الأكبر مني في عمر أمي، والأكبر من أمي،  الحمدلله ده حصاد حب ربنا،والأحلى من كدا ردود الأفعال علي السوشيال ميديا “.

أبطال مسلسل العتاولة

شارك في بطولة مسلسل ” العتاولة” كل من أحمد السقا، طارق لطفى، زينة، باسم سمرة، مى كساب، أحمد كشك، هدى الاتربى، نهى عابدين، ميمى جمال، زينب العبد، منة تيسير،مصطفى ابو سريع، مريم الجندى، مؤمن نور، محمد التاجى، يسرا الجديدى، أضافة إلي عدد أخر من النجوم، والعمل من تأليف هشام هلال، و إخراج احمد خالد موسى.