كتبت: نجلاء علاء الدين
تألقت النجمة زينب العبد، في مسلسل “العتاولة”، من خلال شخصية “قطة”، وتصدرت غالبية مشاهدها مع فريدة سيف النصر التريند منذ بدأ عرض المسلسل، نظرا لخفة دمها وضحكتها المبهجة بمجرد ظهورها أمام الكاميرا.
و حاور موقع أون مصر زينب العبد حول تحضيرها لشخصية “قطة” في مسلسل “العتاولة”، وتحدثت عن تجربة تعاونها مع صناع المسلسل، وكشفت عن تعرضها لوعكة صحية أثناء تصوير الكليب الترويجي للعمل، وكشفت عن مفاجآت أخرى فى السطور التالية.
كيف جاء ترشيحك لمسلسل العتاولة؟ وما الذي حمسك للمشاركة في العمل؟
تم ترشيحي لمسلسل العتاولة عن طريق أحمد خالد موسي، وده مش أول تعاون بيننا، ومافيش حماس أكتر من كده”.
كيف استطعت مزج الشر مع خفة الدم في شخصية “قطة” بمسلسل العتاولة؟
لأني قريت وفهمت شخصية قطة، وكنت عايزة العبها من ناحية الشر وفي نفس الوقت دمي يكون خفيف، زي أستاذ باسم سمرة هو شرير بس الناس شايفه أن دمه خفيف وبيهزر، وكنت حاسه أن قطة لازم تبقي كده، هي مش شريرة شر مطلق ولكن شريرة مع أي حد يقرب من الناس اللي بتحبها، وهي عندها ولاء لأهلها وهما خالتها وولاد خالتها، غير كده أي حد هيقرب منهم هتهبشه، وهي تابع لخالتها اللي ربتها، عشان كده معاها كل الأسرار بتاعتها فلازم تحافظ عليها لأسباب أن مامتها ماتت وخالتها خدتها تحت دراعها”.
حدثينا عن تعاونك مع نجوم مسلسل العتاولة؟
أنا مبسوطة جداً بالتعاون ده، وأنا في قمة سعادتي لأني اتفاجئت بالناس علي المستوي الإنساني، وعلي المستوي الفني كلنا عارفنهم، لكن كل واحد فيهم بيشيل مسلسل وبيشيل بطولة، والناس كلها متعاونة وبتحتوي اللي حوليهم، وبيحبه الشباب وعندهم أنضباط نفسي، مافيش حد فيهم أقل من التاني في المعاملة”.
وماذا عن مشاهدك مع النجمة فريدة سيف النصر؟
من أكتر الأوقات السعيدة لما بشتغل مع الأستاذة فريدة سيف النصر، هي مريحة جداً وعلي طول بتوجهني وعلي طول بتفهمني وعينها معايا ومحوطاني دايما”.
هل واجهتك صعوبات أثناء تصوير مسلسل العتاولة؟
مافيش أي صعوبات في مسلسل العتاولة، أنا متعودة علي الشغل مع أستاذ أحمد خالد موسي، هو إنسان هادي ومؤدب ومش عصبي ومش بيوتر الناس اللي حوليه، وكل مشكلة عنده ليها حل”.
وماذا حدث لك أثناء تصوير مسلسل العتاولة؟
دخلت الطوارئ من شدة الإجهاد، كنت تعبانة ومش حاسة بشيء، وحصل كده وقت تصوير الكليب، بعد ما خلصت الرقص نفسي راح، فضلت أرجع، تقريباً كان برد في المعدة وأنا مش حاسه، وده اللي دخلني طوارئ لأني مكنتش قادرة أخد نفسي”.
كيف رأيتي تفاعل الجمهور مع شخصية “قطة” في مصر ولبنان؟
كل ردود الأفعال بالنسبالي سوشيال ميديا، ودي حاجة مفرحاني، وصحابي اللي نزلوا في مصر حكولي أن الناس عمالة تسال علينا، وأنا لسا بصور وهرجع كمان يومين تلاتة وهشوف ردود الأفعال بعيني، والجمهور الحقيقي هو اللي في الشارع”.
هل تتأثري بآراء الجمهور علي السوشيال ميديا؟
-“بتأثر لو عارفة أن اللي كاتب إنسان صادق في رأيه، وباخد بنصحته، ومش بتأثر لو الموضوع خارج إطار الطبيعي”.
هل تميل زينب العبد لتقديم الأدوار الكوميدية؟
أكون سعيدة لما ألعب أدوار كوميدي، ودي من أقرب الحاجات لقلبي”
هل هناك عمل يعرض في رمضان تمنيتي المشاركة فيها؟ ومن هم النجوم التي تتمني التعاون معهم؟
كل الأعمال الحلوة اللي فيها ناس شاطرة ومجتهدين، وعاملين صدي كويس، كنتي أتمني أكون فيها، حتي لو أي حد لسا طالع، لأن ربنا بيجزينا علي قد التعب”.
ما هي الأعمال التي تستعدين لتقديمها في الفترة المقبلة؟
-“في كذا حاجة حاليا بس لسا مش أكيد، وفي مسلسل خارج السيزون من إخراج عبد الرحمن أبو غزاله، ده هيكون بعد رمضان”.
