كتبت : مريم محمد
انتشر مقطع فيديو لسيدة تدعى عزة الفقي، تستغيث من الفنانة هنا الزاهد وأسرتها ، و اتهمتهم بانهم سكنوا في فيلتها دون دفع الإيجار وأحدثوا عدد من التلفيات فى منزلها، مشيرة إلى انها كانت ترفض مبدأ تأجير المنزل.
إلا أن الفنان الراحل طلعت زكريا كان في وقت سابق تدخل لإقناعها ، موضحة: طلعت زكريا توسط لهما للإقامة في منزلي”.
تفاصيل الأزمة
بدأت الأزمة كما سردتها السيدة فى الفيديو أن أسرة هنا الزاهد قاموا باستئجار منزلها بغرض الإقامة به لمدة ثلاث سنوات، وأنه قبل انتهاء العقد والذى كان مدته ثلاث سنوات فقط امتنعت أسرة هنا الزاهد عن سداد قيمة الإيجار الشهرى بالإضافة إلى رفضهم الخروج من المنزل بعد انقضاء مدة العقد، ونشبت بينهما مشاجرة عبر الهاتف، وهددتها شيرين المنزلاوي والدة هنا الزاهد .
قالت السيدة خلال الفيديو: “انا ست حطت شقى عمرها في مشروع كومباوند، وفي يوم جاتلي مكالمة من السيدة شيرين المنزلاوي والدة الفنانة هنا الزاهد، قالت إنها عاوزة تأجر المكان، وزوجي رد عليها بأنه يرفض الإيجار لأنه مش ضامن سفره هيخلص امتى وهيكون محتاج البيت، وخلصنا الموضوع، كنا رافضين استئجار المكان لكن جتلنا مكالمة من الفنان الراحل طلعت زكريا، وتوسط لهما على مسئوليته الشخصية”.
وأضافت: “ووافقنا وكانوا عاوزين يأجروا 5 سنين، وطلعت زكريا قال وقت ما ترجعوا البيت هيكون في الحفظ والصون، فإحنا كأسرة اقتنعنا بكلامه وقلناله نأجر 3 سنين فقط، وشيرين مضت العقد بـ 3 سنين وابتدوا يدفعوا الإيجار وساعات كانوا بيأخروا دفع الإيجار بسبب ظروف الشغل”.
وتابعت: “لما كلمناهم إنهم يرجعولنا البيت لما رجعنا مصر، رفضوا وإحنا بنقولهم دا بيتنا ومضطرين نرجع البيت، وإحنا مأجرين أغلى من اللي بتدفعوه وشيرين ردت عليا، وقالت ألفاظ بشعة، وقالت إحنا مش خارجين وأعلى ما في خيلكم اركبوه،وبعدين توقفوا عن دفع الإيجار تماما، ف اضطرينا إن احنا نرفع قضية واننا نسترد البيت، ف المحكمة حكمتلنا إنهم يخرجوا من البيت ويدفعولنا لغاية نهاية عقد الإيجار، إحنا طالبنا بالبيت قبل المدة ما تخلص وكان فاضلهم وقت في العقد، ف كانوا توقفوا عن الدفع في فترة، ف المحكمة حكمتلنا باسترداد البيت، يعني في الفترة اللي خدنا فيها الحكم ده كان عقد الإيجار خلص وهما قاعدين سنتين بعد العقد ما خلص في البيت”.
وصرحت : “وخرجوا من البيت بعد كدة مش عايزة أقول إزاي بس كانت فترة عصيبة علينا جدا إنهم يخرجوا، دخلنا البيت لقينا تلفيات رهيبة، يعني مش عايزة أقول إن الأحواض وجرانيت المطبخ اتاخد مش عارفة إزاي، رفعنا قضية تانية بالتلفيات، والقضية راحت المحكمة استئناف ودرجات القضاء خدناها كلها، لأن كل مرة يرفعوا قضية مضادة، بس الحمد لله القضاء نصفنا وادانا حقنا، معانا حكم محكمة من فبراير 2024 مش عارفين ننفذه، مش عارفين نستدل لهم على عنوان لا عن طريق محاميهم ولا عن طريق الوساطة”.
وأكملت: “أخو شيرين المنزلاوي كلّمنا يساومنا إننا ندّيهم فلوس عشان يخرجوا من البيت، والقضايا شغّالة والقضاء نصفنا، لكن انا مش عارفين نوصلهم، وحاولنا التواصل معاهم من خلال المخرجة منى الأبحر، إنهم يدفعوا اللي عليهم معرفتش توصل معاهم لأي نتيجة، وشيرين المنزلاوي أهانت جوزي وإدت السماعة لهنا قالت له أنت موّتت أبونا، وجاي تموت أمنا وأنا مش عارفة هي إزاي تقول كده، وهي عارفة إن عليهم فلوس ومخالفات”.
واختتمت: “مستغربة لما شفت لقاء تلفزيوني لهنا الزاهد شكّيت في نفسي وقولت بيروحوا يناموا على المخدة إزاي وعندهم كام وش، وإحنا مصمّمين على حقنا وفيه محضر بيلزمها بإصلاح التلفيات، ومش عارفة هما إزاي ورا الكاميرا ناس تانية كده”.
