كتبت: هاجر زينهم
انتشر في الأيام الماضية برومو لفيلم يتحدث عن ضحايا ليبيا الذين قتلوا على يد منظمة إرهابية.. وتواصل أون مصر مع مؤلف فيلم شهداء الوطن والإيمان مينا مجدي لكشف كواليس العمل وما علاقته بالبرومو الذي أثار الجدل عبر السوشيال ميديا مرخرًا
هل البرومو الخاص بضحايا ليبيا الذي طرح مؤخرًا له علاقة بفيلم شهداء الوطن والإيمان؟
بالنسبة البرومو اللي نزل مالوش علاقة بالفيلم الرسمي للكنيسة، والبرومو لفيلم قصير ناطق بالإنجليزية وصناعه مصريين وغير مصريين.
وهو عمل خاص مستوحى من شهداء ليبيا ومالوش علاقة بالقصة الطبيعية الأصلية والبرومو بقاله شهور لكن بدأ ينتشر تاني واختلطت على الناس الأمر.
حدثنا عن فيلم شهداء الوطن والإيمان؟
اسم شهداء الوطن والايمان ده مبدأي وهيتغير لاسم فني آخر، وهو الفيلم الوحيد اللي أخد كل التصاريح الخاصة بالكنيسة القبطية المصرية.
بقيادة البابا تواضروس والأنبا ترانس مالوت والكاتدرائية الايمان والوطن واللي ساهمت فيها الدولة.
هل خضع الفيلم للمراجعة من قبل الجهات المختصة؟
ده الفيلم الوحيد اللي أخد الموافقة عليه والوحيد اللي تمت مراجعته والفيلم الوحيد اللي أعلنت عنه الكنيسة المطرانية رسميًا سنة 2020.
الفيلم بيظهر الجانب الخاص بالدولة ورد فعلها مش بس بعد استشهادهم ولكن رد فعل الدولة من وقت ما تم اختطافهم لحد استشهادهم.
كيف تناولت هذه القضية لكونها قضية حساسة؟
الفيلم بيظهر التلاحم الشعبي المصري بين نسيج الوطني الواحد ما بين المسلمين والمسيحيين بداية من قريتهم لحد كل محافظات مصر وإزاي الكل كان متوحد ومتفاعل تمامًا في القضية.
لكن الجزء اللي هيكون مفاجأة هو أنهم كان فيهم جزء كبير خلصوا فترة تجنيدهم في الجيش والفيلم بيظهر حياتهم المرتبطة بالحياة العسكرية وكانت إيه طبيعة حياتهم وانتمائهم بالوطن
ما الجديد الذي يقدم فيلم شهداء الوطن والإيمان عما قدم في فيلم السرب؟
المعلومات اللي اتقدمت في فيلم السرب مكنتش حقيقية ومغلوطة لكن هيتم عرض التفاصيل والمعلومات الحقيقية والأجواء اللي عاشوها والأحداث اللي مروا بها في الفيلم.
وخصوصًا فترة الـ 30 يوم اختطاف هي اللي هنشوفها في الفيلم بتاعنا بشكل حقيقي جدًا وهيبقى حديث ومسار العالم، مش مجرد مصر بس أو البلاد العربية وقريب هيتم تصويره.
ما نوعية دراما الفيلم هل هي دينية بحتة؟
الفيلم مش مجرد فيلم ديني أو خاص بالكنيسة المصرية لكنه فيلم إنساني من الدرجة الأولى ووطني واجتماعي وفيه ثورة دينية لأن تم خطفهم وإعدامهم على هوية دينية ووطنية وكل ده ظاهر في الفيلم وهيكشف أسرار حقيقية.
هل تم الاستقرار على القائمة المبدئية للأبطال؟
لسه لحد دلوقتي لم نستقر على الأبطال بشكل نهائي لكن الأكيد هيبقى في مفاجآت كبيرة جدًا في الأبطال لأن مرشح أسماء كبيرة من نجوم الصف الأول.
هل سيكون الفيلم بطولة مطلقة أم جماعية؟
هيكون من بطولة جماعية لأننا بنتكلم عن 21 شهيد وكمان هيتكلم عن التنظيم الإرهابي اللي كان بيواجههم ده غير شخصيات تانية حواليهم وبيكشف حوادث وحالات ممكن المشاهد يغفل عنها حصلت في نفس الوقت كانت بتدور حواليهم هيتم عرضها كمان عشان كده البطولة هتكون قوية جدًا ومنافسة شرسة في التمثيل
هل سيتم الاعتماد على ممثلين مصريين فقط ام هناك إمكانية لانضمام جنسيات أخرى؟
اعتقد أن البطولة مش هتكون معتمدة بس على المصريين ولكن هيشارك ممثلين من جنسيات عربية لأن الفيلم في لهجات مختلفة.
أين سيكون العرض لفيلم شهداء الوطن والإيمان؟
هو طبعا رقم واحد الفيلم هيتعرض في خارج مصر وداخل مصر بكل المطرانيات، والكنيسة الأرثوذكسية هتعمل عروض خاصة جماهيرية على شاشات سينما عملاقة
والفيلم هيتعرض كمان في سينما، وبعدها في منصات سينمائية ولسه هيتم التعاقد مع منصة، ده غير فكرة جديدة وهي وهيتم عمل الفيلم في شكل سيديهات على مستوى العالم وهتكون متاح للكل.
