كشف حسام حسن، المدير الفني لمنتخب مصر، وإبراهيم حسن، مدير المنتخب، عن العديد من الأمور التي تخض منتخب مصر خلال مؤتمر إعلان قائمة الفراعنة استعدادًا لمعسكر مارس الجاري.
ومن المقرر أن ينطلق معسكر منتخب مصر يوم الأربعاء المقبل الموافق 13 من شهر مارس الجاري؛ استعدادا للبطولة الودية التي تضم منتخبات كرواتيا و تونس و نيوزيلندا والمقرر إقامتها في أبو ظبي.
وجاءت تصريحات حسام وحسن إبراهيم خلال المؤتمر الصحفي كالتالي..
إبراهيم حسن:
- عندنا ماتشين يوم 22، و26 مارس، وأول مباراة مع نيوزيلندا، ولو فزنا هنقابل الفائز من مباراة تونس وكرواتيا.
- هنتجمع يوم 13 بعد مباراة الأهلي الأخيرة قدام البنك في الدوري المصري.
- يوم 17 أو 18 اللاعبين المحترفين هييجوا المعسكر في الإمارات.
- طلبنا إننا نشترك بقوة في بطولة الإمارات الودية بغض النظر عن النتائج، احنا يهمنا النتايج بردوا، لكن الأهم إننا نشوف اللاعبين ونتكلم معاهم.
- كابتن حسام أصر على خوض البطولة رغم إن اتحاد الكرة كان ممكن يعتذر عنها.
- محمد صلاح لم يتم استبعاده، ما حدث جاء بناءً على طلبه بسبب الإصابة بتاعته.
- محمد صلاح شايف إنه الفترة دي محتاج يتأهل بشكل أكبر مع ليفربول، هو ده اللي نعرفه وده اللي وصلنا.
- احنا بالنسبة كنا نتمنى إنه يكون موجود معانا لأنه كابتن المنتخب، ووجوده كان هيفرق مع اللاعبين نفسيًا.
- محمد صلاح مكنش عايز يكون موجود عشان يكمل تأهيل مع ليفربول ويتدرب بشكل أفضل.
تصريحات حسام حسن:
- كنت بفكر في ضم رمضان صبحي وحاولت أعيده نفسيًا ومعنويًا لكن لظروف معينة اللاعب مش هيكون معانا
- مصر مش هتقف على لاعب ممكن يكون مهم ما دام في لاعبين آخرين ممكن يكونوا موجودين.
- قايمة منتخب مصر مفتوحة للجميع.. وكل الناس في الشارع بيتمنوا عودة المنتخب اللي نعرفه.
- كنت أتمنى يكون في وقت كبير إن أنا أشتغل بشكل أفضل وأكبر مع اللاعبين عشان الرؤية بتاعتنا تتضح بشكل أفضل.
- كنت عايز آخد اللاعبين يوم 9 ونبدأ المعسكر يوم 10، لكن ظروف الدوري ولجنة المسابقات أصرت إننا نبدأ يوم 13.
- المعسكرات الصغيرة في المنتخب شفناها مع مدربين آخرين وفشلت، ومهم إننا نرجع المعسكرات الطويلة.
- احنا لسه موصلناش للمرحلة الاحترافية اللي تخلينا نلعب معسكرات صغيرة ونلعب في البطولات بعدها على طول.
- كل اللي احنا بنعمله حاليًا عشان خاطر عايزين نروح كاس عالم، ومنتخب مصر فوق كل شيء.
- مشاركة اللاعبين الصغيرين مع أنديتهم مهم جدًا عشان أقدر أنزل بمعدل الأعمار.
- أحمد نبيل كوكا بيشارك طول الوقت مع الأهلي، ومحمد الشامي ومحمد شكري وشوبير عناصر صغيرة والجمهور بيأمل فيهم خير.
- أتابع عبد الله السعيد بشكل جيد.. وفي حال تطور مستواه سينضم لمنتخب مصر مستقبلًا
- محمد شكري من العناصر المميزة في الدوري المصري.. ونأمل فيه خير أن يكون إضافة للمنتخب.
- عبد الله السعيد كان في دماغي وأنا متابعه وأتمنى إنه يكون أفضل في الفترة اللي جاية.
- أنا مش بختار على حسب النادي أو الاسم، أنا بختار على حسب الأداء.
- لاعيبة الزمالك لسه موصلوش لمرحلة الانسجام، ومصطفى شلبي كنت عايز أضمه، لكنه لسه عايز يكون جاهز بشكل أفضل.
- تواصلنا مع محمد النني وهو مش لاعب صغير، وهو لاعب كبير في الكرة المصرية، ولظروف عدم مشاركته مع أرسنال لم ينضم، اتكلمنا معاه وهو تقبل الأمر.
- عمر انضم للأهلي، وهو لاعب جيد لكن عدم مشاركته باستمرار مع الفريق وراء استبعاده، وأنا لا أنظر لخلافي مع اللاعبين، أنا أنظر فنيًا فقط.
لمتابعة مزيد من الأخبار اضغط (هــــــنــا)
تابعنا من خلال صفحتنا على الفيس بوك من (هــــــنــا)
