كتبت : نجلاء علاءالدين
رد المؤلف محمد عبد العزيز، على بيان كلية التربية الموسيقية بجامعة حلوان، الذي اتهم صناع مسلسل “تيتا زوزو” بإهانة الكلية وطلابها وخريجيها، وذلك بعد وصف العازفين بـ بالآلاتية.
وقال محمد عبد العزيز لـ “أون مصر”: “البيان متعجل وأنا خريج جامعة حلوان كلية الآداب وبعتز جدا بجامعتي وكل الكليات المنتسبة للجامعة.. والكلام اللي اتقال في الحلقة التانية كان له رد في باقي الحلقات.. وجهات نظر صناع العمل كلها مختلفة عن اللي اتعرض.. وده كلام علي لسان شخصية وده تفكيرها وأسلوبها.. مش معني أن الكلام أتقال علي لسان الشخصية دي يبقي أنا بؤمن به”.
وتابع:”محمود انزعج من البيان وكان عايز يرد عشان يوضح أنه مقالش كده علي الموسيقين وأن ليهم احترمهم.. والجزء ده اترد عليه في نفس المشهد لما مدام إسعاد يونس بطلة العمل قالت أن الموسيقين ليه احترمهم مسمهمش الآتية.. وقالتله وانت صغير كنت بتحب الموسيقية وكنت عايزاك تدرسها بس انت مكنتش عايز”.
وأتم حديثه قائلا:”وأتقال بعد كده في مشهد تاني ليه متدخلش كلية تربية موسيقة قالهم أنا مش عايز أدرس بليغ حمدي وعبد الوهاب.. قالوا انت متقدرش توصل ليهم دول عباقرة وفنانين كبار.. وهو قال عليهم أنهم مش هيتكرروا ولكن أنا عايز أدرس الحاجات اللي بحبها.. اللي مش موجود في المعاهد والكليات.. فنفسي أدرسه بره ليه أضيع عمري في الموضوع ده.. غير أن شخصية “سيف” مع توالي الحلقات هنفهم وجهة نظره وإزاي أتكونت وهل هو ممكن يتغير أو ميتغرش”.
أحداث مسلسل تيتا زوزو
تدور أحداث مسلسل “تيتا زوزو” في إطار درامي اجتماعي حول الجدة الأرملة زوزو التي كانت تعمل بالزراعة، وهي أم لأربعة أبناء وجدة لسبعة أطفال وأحفادها يعتبرونها مثلهم الأعلى وحين يقعون في أي مشكلة يلجأون لها وتحاول دائمًا التقرب منهم وتحب ما يفعلونه وتحاول تعلمه، ولكن تقع دائمًا في خلاف مع أبنائها لأنهم يرونها تربي الأحفاد بطريقة لا تتناسب مع العصر الحالي وفي كل حلقة تحاول حل مشكلة لواحد من أحفادها.
أبطال مسلسل تيتا زوزو
ويشارك في بطولة مسلسل “تيتا زوزو” كل من إسعاد يونس، إسلام إبراهيم، مصطفى غريب، إيناس كامل، محمد كيلاني، حمزة العيلي، نور محمود، عابد عناني ، وإيمان يوسف، وعدد من الأطفال،والعمل من تأليف محمد عبد العزيز وإخراج شيرين عادل.
