بعد اتهامه بسرقة العمل.. جوزيف فوزي: محمد سعد أراد العمل مع مخرج قوي في الدشاش

كتبت: نجلاء علاء الدين

تحدث جوزيف فوزي مؤلف فيلم “الدشاش”، عن الأزمة الذي اشتعلت أمس بعد اتهامات المخرج أحمد البنداري لصناع العمل، وأكد فوزي أن محمد سعد رفض التعاون مع البنداري باعتباره مخرج صاعد، وأكد أنه فضل العودة للسينما عن طريق مخرج كبير.

وأوضح جوزيف فوزي تفاصيل ما حدث من خلال تصريحات خاصة لموقع “أون مصر”، قائلا: “أحمد البنداري مقالش أن فكرة الفيلم مسروقة هو قال إنه اشتغل على الفيلم من الناحية الإخراجية، وأنا الفيلم بتاعي من أيام ما كان اسمه كعب داير ومتسجل في الرقابة من 2016،  وهو نزل عنه أخبار في 2018، وأنا كنت هعمله مع سيف يوسف ووقتها محصلش نصيب”.

وتابع: “أحمد البنداري وقتها مكنش مخرج، وفضل الفيلم موجود لحد ما دخل محمد سعد هو عجبه الفيلم بس مكنش عايز يشتغل مع مخرج جديد، فالبنداري صعبان عليه إنه اشتغل على الفيلم واختار ممثلين والراجل موفقش عليه، وده من حقه كنجم كبير زي محمد سعد لما يرجع بعد غياب يبقى عايز يشتغل مع ناس يطمن ليهم، والبنداري بيعمل سفاح التجمع مش معقولة نبقى سارقين الفيلم منه وهو شغال في حاجه تانية، وأنا قولت له الناس فهمت غلط وهو راح شال البوست وهينزل توضيح”.

جوزيف فوزي: فيلم الدشاش قوي جدا وهيبرز موهبة محمد سعد

وأضاف: “الراجل كان بيعاتب محمد سعد لقيت الناس دخلتني في الموضوع، محمد سعد بالنسبة ليا اتعملت معاه 4 شهور مشفتش منه غير كل خير وعاملين فيلم قوي جدا الناس هتعرف قد أي هو فنان كبير وموهوب جدا، والفيلم هيبروز موهبة وطاقة محمد سعد الكبيرة جدا وأنا بحمد ربنا على الدشاش”.

وأكمل:”وفي الآخر حابب أوضح أن محمد سعد نجم كبير ومن حقه يختار هيشتغل مع مين، التلت شهور اللي بنداري اشتغل على الفيلم فيهم كانوا قبل ما يتعرف على محمد سعد وهو علاقته بسعد كانت في المقابلة بس، ووقتها قالنا الفيلم حلو جدا”.

جوزيف فوزي: محمد سعد فضل العودة للسينما عن طريق مخرج قوي

وأوضح: “محمد سعد من النوع اللي بيفكر كتير وتاني يوم كلمني وقالي أنا مش هعرف اشتغل مع مخرج جديد، وأنا كلمت بنداري اعتذرت له وزعل شوية، وبعد كده بقينا حبايب
وكان داخل فيلم اعتذر عنه بعد كده رجعله تاني”.

وأتم حديثه قائلا:”والموضوع كله سوء تفاهم وأنا كلمته وقالي أنا مقولتش لأنكم سارقين الفكرة، أنا قولت أنك محتاج فرصة، قلتله فرصة ايه يا بنداري انا واحد عامل تياترو مصر وعامل مسلسل لمحمود عبدالعزيز وميرفت امين واحد عامل 120 عمل فرصة ايه يبني وهو اختياره للكلمه مكنش موفق فيها