كتبت: نجلاء علاء الدين
كشف الفنان إحسان الترك، كواليس المشاجرة التي حدثت في منزله مع صاحب العقار، والتي انتهت بقفز صاحب العقار من شرفة البلكونة، بعد إبلاغ الشرطة، وأكد إحسان الترك في حواره لموقع “أون مصر” أنه يتعرض للإيذاء الدائم من هذا الشخص هو وكل المتواجدين في الطوابق الأخرى.
إحسان الترك لـ أون مصر: صاحب العقار عايز يطردني عشان ياجر الشقة للسودانيين..وحاول يولع فينا
وقال إحسان الترك: “الراجل اتبلى عليا، ووكيل النيابة قالوا الراجل ده هيقدر يشيلك ويرميك من البلكونة، الراجل حجمه كبير قدي خمس مرات طول وعرض، وسبب المشكلة إني ساكن في الشقة دي بقالي تسع شهور وعقدي سنتين، كل فترة يجي عايز زيادة في الإيجار 1000 جنيه، ويقولي السكر غالي والرز غالي، والسودانين بيأجروا الشقة دي بـ 10 ألف جنيه، والمحامي بتاعه نفسه قال إنه بيعشق الفلوس، وأنا رفضت اديلوا فلوسه، ودفعتها في المحكمة، ولكن هو مشبوه ومش عايز يروح يجبها من المحكمة، رحت عشان اجبهالها منفعش”.
إحسان الترك: صاحب العقار تهجم علي زوجتي أكثر من مرة..وقفز من البلكونة بعد إبلاغ الشرطة
وتابع: “كل شوية يجي يتهجم على المدام في البيت ويقول شتيمة قذرة، ومرة خطف الأنبوبة وكان عايز يولع فينا، ولما جالي يوم الخميس وأنا كنت نايم تعبان، وكان معا جارنا سوداني وابنه الصغير، وبعت مراتي تجيب ليهم بيبسي، وقفلت الباب وهي نزلة، أنا عندي باب حديد وباب خشب، الخشب دايما مفتوح لكن الحديد بنقفله، وعاملين الباب عشان الولاد خايفة منه، ومافيش حد في البيت غيري أنا وهما، واحنا بنتكلم قولته الفلوس هتاخدها من المحكمة، قعد يزعق ومش عايز يهدأ، وأنا مكنش معايا مفتاح الشقة وهو لما لقي الباب مقفول فكر أننا عاملين كمين، والمدام اتصلت بالشرطة لما خافت عليا، وأول ما حس بكده، نط من البلكونة، احنا ساكنين في الدور الأول”.
وأكمل: “رحنا القسم، وقعدت مع المأمور في المكتب، وتاني يوم رحنا النيابة، وهو قل أدبه على وكيل النيابة، والنهاردة تم الصلح بعد ما قدم فيا بلاغ شروع في قتل، وأنا مش فلوس عشان أسيب الشقة وأروح مكان تاني، الشغل واقف معايا عشان كده قاعد في الهرم”.
إحسان الترك: صاحب العقار شخص مزوز
وأضاف: “هو طلع مزور، عقد الإيجار باسم يسري حسن السيد، وفي القسم طلع اسمه يسري السندي الهندي، وهو علي أحكام وهربان منها”.
إحسان الترك يناشد المسئولين في الدولة
وأتم حديثه بمناشدة المسئولين في الدولة: “أشرف زكي ومنير مكرم كلموني أول ما خدت إخلاء سبيل، وأنا بناشد الرئيس السيسي ورئيس مجلس الوزراء عشان يجبوا حقي أنا وكل المتضررين في العقار، هو قاطع علينا المياه والنور، وبيجي يهددنا كل شوية”.
