إبراهيم السمان لـ أون مصر: نهاية “حق عرب” مفاجأة للجمهور.. و”العوضي” ضربني بالقلم بجد (حوار)

حاورته: نجلاء علاء الدين

شارك النجم إبراهيم السمان في دراما رمضان 2024، من خلال ثلاثة أعمال، وهم مسلسل “حق عرب” ومسلسل “بيت الرفاعي” ومسلسل “بـ 100 راجل”، وقدّم في كل عمل منهم شخصية مختلفة عن الأخرى من ناحية طريقة الحديث أو المظهر العام.

وحصد السمان إشادات كثيرة حول أدواره في رمضان، لذلك أجرى موقع “أون مصر” حوارًا معه للكشف عن كواليس تحضيره للشخصيات التي قدمها وعن أصعب المشاهد له.

إلى نص الحوار..

حدثنا عن مشاركتك في رمضان 2024 بثلاثة أعمال وكيف استطعت الفصل بينهم؟

-“الحمدلله أنا كان عندي ترشيح لأكثر من حاجة، أستاذ محمود حمدان كلمني على شخصية محسن في مسلسل (حق عرب)، وكلمني عن شخصية ميشو في مسلسل (بـ 100 راجل)، وأي ممثل يستفزه أن الورق والكتابة يكونوا كويسين جداً، ولما جيت أذاكر بطريقتي عن طريق مدرسة التشخيص بتاعتي، اتعلمنا إننا لما بنمسك كل شخصية بنبدأ نحط نقط معينة وده بعد ما بنقعد مع المؤلف، وأنا حاولت أخلي شخصية ميشو مختلفة عن محسن من خلال الوضع الاجتماعي وطريقة الكلام والأداء”.

ما هي أكثر شخصية أرهقتك في التحضير؟

-“أي ممثل بيحب شغله بيتعب في تحضير الشخصيات، عشان يخرج من الطابع بتاعه، ومن ضمن الحاجات اللي مش صعبة ولكن الممثل بيكون عايز يكون مختلف، بيركز جداً أنه لما يقدم حاجة تكون بعيدة عن شخصيته الحقيقة، وكل ده بيكون محتاج تركيز وتفاصيل كتير، وأنا حاولت بقدر المستطاع إني أعمل ده”.

كيف رأيت ردود الأفعال على مسلسل حق عرب؟

-“ردود الأفعال هايلة، وأنا من أول ما قريت الورق كنت مبسوط جداً، وقولت لـ محمود حمدان بصراحة الورق مختلف ومنضبط، ودي حكاية شعبية جميلة أوي وبقالنا كتير مشفناش حاجات محبوكة كده، وكل شخصية في مسلسل (حق عرب) مرسومة من واقع حقيقي أوي، وأنا كنت متفائل من البداية، وبعد ما عرضنا الحلقات مردود النجاح في الشارع جميل أوي”.

ما رأيك في تجربة التعاون مع أحمد العوضي؟

-“أحمد العوضي نجم وعنده قاعدة جماهيرية على مستوى الشارع، أنا شفتها في الشارع لما كنا بننزل نصور في المعز، هو شاطر جداً وبيذاكر على طول وبيهتم بالتفاصيل، ومعانا المخرج إسماعيل فاروق وكان دائما بيحاول يخرج كل جديد عند الممثل”.

هل توقعت نجاح مسلسل حق عرب؟

-“أنا كنت متوقع النجاح، لأني من أول ما قريت حسيت أن الورق مختلف، توقعت نجاح مسلسل (حق عرب) بنسبة 70% ولكن النجاح فاق توقعاتي”.

ما هو أصعب مشهد لك في مسلسل حق عرب؟

-“كل المشاهد بالنسبة ليا امتحان بكون عايز أحقق فيه الدرجة النهائية، وأنا بحاول أعمل اللي عليا، في مشاهد بتحتاج مذاكرة وتركيز ومشاعر، وده حصل معايا في مسلسل (حق عرب) في المشهد اللي بلوم فيه أحمد العوضي عشان ساب حبيبته، والقلم كان حقيقي، واتصور 3 مرات، أستاذ إسماعيل فاروق في البروفة اداني القلم أقوى من أحمد العوضي، لوحني في فكي، وكان في مشهد تاني لما وقفت جنب صاحبي عشان الإدمان، وأنا عملته بشكل لايت ولكن كان كله مشاعر، وكان لازم يطلع من القلب عشان يوصل القلب”.

كيف رأيت تفاعل الجمهور مع شخصية محسن في مسلسل حق عرب؟

-“الجمهور اتعلق بشخصية محسن في مسلسل (حق عرب)، لأن هو الصاحب الجدع، والجمهور بيحط نفسه مكان الممثل، المشاعر اللي بين عرب السويركي ومحسن، الجمهور كان حاسس بيها عشان هما بيحبوا الجدعنة، والناس بدأت تكلمني وتقولي خد بالك من صاحبك”.

ماذا عن نهاية مسلسل حق عرب؟

-“الحلقات الجاية فيها مفاجآت، محمود حمدان عنده قفلة حلقات مفاجئة، محمود حمدان عنده قفلة الحلقات بتخالف توقعات الجمهور ودي مش موجودة عند كل المؤلفين”.

ما رأيك في تقديم جزء ثاني من مسلسل حق عرب؟

-“أنا مع أن احنا نقدم مواضيع جديدة، والجمهور هو الحكم، لو طلب تقديم جزء تاني من مسلسل (حق عرب) هنقدمه، بس ده بيكون ضغط لأنك عايزة تقدمي نفس الشيء بأكثر حرفية عن الجزء الأول”.

كيف جاء ترشيحك لمسلسل بيت الرفاعي؟

-“ترشيحي لمسلسل (بيت الرفاعي) عن طريق أحمد أبوالفتوح من الشركة المنتجة، وبعدين قعدت مع المخرج أحمد نادر، وعملت شخصية بذرة وهو صديق أمير كرارة، وأنا بقعد أطلع لكل شخصية بقدمها ملف معين، وشخصية بذرة مختلفة عن محسن وميشو، اتبسطت بالتجربة مع مخرج مهم زي أحمد نادر جلال وشركة سينرجي، وأمير كرارة شخص بمنتهى الجمال وذكي”.

هل رأيت مواضيع مشابهة لقصة مسلسل بيت الرفاعي على أرض الواقع؟

-“احنا بنحاكي مواضيع حقيقة حصلت في المجتمع، عشان نوجه الناس، وكل المواضيع اللي بتتقدم من النوع ده، بتتماشى مع مواضيع حقيقية في المجتمع، وممكن في يوم من الأيام مسلسل (بيت الرفاعي) يحل مشاكل أي عائلة”.

كيف ترى تجربة التعاون مع نجوم مسلسل بيت الرفاعي؟

“تجربة التعاون مع نجوم مسلسل (بيت الرفاعي) أكثر من رائعة، اشتغلت مع أمير كرارة وأحمد رزق ومع محمد لطفي هو من الناس الجميلة”.

حدثنا عن شخصيتك في مسلسل بـ 100 راجل؟

-“شخصيتي في مسلسل بـ 100 راجل، ميشو شخص أفاق وبيلعب بالبيضة والحجر، هدفه في الحياة كلها الفلوس، وكان معايا مفاتيح الشخصية، وهو إنسان مادي جداً بيعمل أي حاجة عشان الفلوس، وكان تحدي ليا أني أقدم عملين لنفس المؤلف، ودي ثقة من محمود حمدان، والحمدلله قدرت أعمل الاتنين مختلفين عن بعض”.

ما تعليقك على الانتقادات التي تعرض لها مسلسل بـ 100 راجل منذ طرح البرومو؟

-“الجمهور هو السيد الحكم من حقه ينتقد ويقول رأيه حتى لو قبل العرض، ولكن بعد ما يشوف المحتوي نفس الجمهور بيرجع يقول احنا كنا ظالمينه، والحمدلله ورق المسلسل كان هايل، وأهم حاجة عندنا الورق، واحنا مجتمع دسم وفي حكايات ومواضيع كتير نقدر نقدمها بشكل قوي”.

من وجهة نظرك مسلسل بـ 100 راجل واخد حقه في المشاهدة؟

-“معنديش فكرة لأني لسة مخلص تصوير، بس أنا جالي ردود أفعال كتير على شخصيتي في المسلسل”.

ما رأيك في دراما رمضان 2024؟

-“الناس كلها بذلت مجهود في موسم رمضان 2024، والأعمال في منتهى الروعة، أنا حبيت مسلسل (الحشاشين وجودر وأعلى نسبة مشاهدة)”.

ما هي الأعمال التي تحضر لها في الفترة الحالية؟

-“بحضر لـ فيلم سينما هيكون حاجة جديدة ومختلفة، وعندي برنامجي (كريزي تاكسي) عملت منه 3 أجزاء وحاليا بجهز لبرنامج (كريزي أوردر).