كتب – صلاح حسن:
خرج مطرب المهرجانات حمو بيكا، عن صمته للرد على زميله مطرب المهرجانات حسن شاكوش، بعد حديثه عنه بشأن عدم دعوته لحضور حفل عقيقة ابنته تاج، الذي أقامه قبل نحو أسبوع.
وقال حمو بيكا، في مقطع فيديو عبر “تيك توك”، إنه ليس عدوا لحسن شاكوش، كما تحدث عنه، متابعا: “أنا بعتلك الدعوة بتاعتك مع مدير أعمااك وانت اللي مش عاوز تيجي”.
وتابع حمو بيكا، قائلا: “طالع تقول عدوك ابن كارك ليه يا حسن عيب عليك وبعدين أنا بعت الدعوة مع كامبا مدير أعمالك بما قابلته قولتله بتصل على حسن شاكوش تليفونه مقفول خد الدعوة دي وصلهاله”.
واستطرد حمو بيكا، قائلا: “الدعوة وصلت لمدير أعمالك يبقى وصلتلك يا حسن وبدل ما كنت تفتح لايف تتكلم كنت جيت.. أنا بعتبرك أخويا وانت طول عمرك في ضهري وأنا طول عمري في ضهرك وربنا ما يجيب عداوة أبدا”.
وعقب أبو تاج، قائلا: “أنا اتصلت على عمر كمال في التليفون بردوا وعزمته ومجاليش، عادي يعني يا حسن واسأله بردوا انتوا اخواتي وطول عمرنا مع بعض، ومش هقول عداني العيب ولا حاجة عشان اللي عملته واجب عليا ومش زعلان منك، أنا جيتلك فرحك ولما يكون في فرحة عندك بردوا هيجيلك وهكون أول واحد واقف معاك”.
يذكر أن حسن شاكوش، كان قد عاتب على حمو بيكا، عدم دعوته لحضور حفل عقيقة ابنته تاج، مؤكداً أنه لم يحادثه أو يدعوه للحضور، مؤكداً أن ما حدث يعد تجاوزا لكنه لن يلتفت لمثل تلك الأمور وضرب مثلاً شهيرا لكونهما في نفس المهنة وهو “عدوك ابن كارك”، وهو ما جعل حمو بيكا يرد حالياً.
