كتبت : مريم محمد
أعرب الفنان تامر حسني عن تقديره لحديث المخرج محمد سامي عنه، بعدما وجه له المخرج محمد سامي رسالة يشكره فيها على دعمه له بداية مسيرته الدرامية، موضحاً أنه كان من أوائل الذين آمنوا بموهبته في مجال الدراما.
وكتب الفنان تامر حسني، عبر حسابه “انستجرام”:” يمكن وقفت الوقفات دي مع ناس كتير بس لما كبروا استكبروا يقولوا كلمة حق، أو لو اتقالت بتتقال من ورا القلب، سبحان الله أكتر حد قال كلمة تجبر خاطري هو أكتر واحد ناجح”.
وتابع :” اللي أنكر وأتحول اختفى، والأصيل نجل وعدى كل حدود النجاح بمجهوده وقلبه، لا يصح إلا الصحيح شكرًا يا أسطورة جيلك يا حبيب قلبي يا محمد يا سامي، وربنا يزيدك نجاح وقوة وتألق”.
و في سياق متصل ، نشر المخرج محمد سامي صورة تجمعه مع الفنان تامر حسني و علق عليها :”ولا تنسوا الفضل بينكم، وأنا قاعد امبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسه ويحقق أحلامه، فطبعا افتكرت أخويا وصاحبي الجدع الطيب الخلوق اللي دعمني من أول لحظة، وكان سبب في اللي أنا فيه دلوقتي”.
واستكمل محمد سامي: “فاكر إن الكل كان رافض إني آخد الفرصة دي ومستكبرينها عليا إلا هو وقف في ظهري كأنه بيحارب لأخوه، وبصلي مرة والظروف كلها ضدي وكنت حاسس وأنا بحضر أنهم هيجيبوا حد غيري وقال لي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقول لي مسلسلك كأني عامل 9 مسلسلات قبله، تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو-طاقم العمل- محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني”.
