كتبت: نجلاء علاء الدين
بدأ منذ قليل، عزاء الفنان الراحل تامر ضيائي في مسجد الشرطة، وحرص على تقديم واجب العزاء عدد من نجوم الفن من أبرزهم أشرف زكي نقيب المهن التمثيلية، ومحمد رضوان والمخرج خالد جلال وعمرو عبد العزيز، وإيهاب فهمي ومحمد ممدوح.
![عزاء تامر ضيائي](https://on-msr.com/wp-content/uploads/2024/07/WhatsApp-Image-2024-07-22-at-9.59.19-PM-300x200.jpeg)
وكان قد أعلن مسؤولو الصفحة الرسمية للفنان الراحل تامر ضيائي، عن تحديد موعد العزاء، للراحل بعد وفاته يوم الأربعاء الماضي بعدما تشاجر مع فرد أمن، داخل مستشفى الثدي التابعة للمعهد القومي للأورام بالتجمع.
![عزاء تامر ضيائي](https://on-msr.com/wp-content/uploads/2024/07/WhatsApp-Image-2024-07-22-at-9.52.07-PM-300x200.jpeg)
وفاة الفنان تامر ضيائي
وكان قد أعلن الفنان عمرو عبد العزيز، نبأ وفاة الفنان تامر ضيائي عبر حسابه الرسمي بموقع تبادل الصور والفيديوهات “إنستجرام”، وكتب: “إنا لله وانا اليه راجعون كده يا تامر تمشى فجاءه كده و تخضنا كلنا، لا إله إلا الله.. الله يرحمك يا حبيبى ويجعل مثواك الجنه يارب العالمين”.
وصية الفنان تامر ضيائي قبل رحيله
وقد كشف الفنان تامر ضيائي في وقت سابق عن وصيته من خلال منشور له عبر حسابه الرسمي علي موقع “فيسبوك” وكتب: “بوست وصية.. هيفضل باين على صفحتي لحد ما أموت.. الحقيقة اللي كلنا عارفينها ومتأكدين منها إننا كلنا ربنا كاتب لنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة ووقتها طبعاً مش هعرف أقولها لحد. ودي وصيتي”.
وتابع: “صلاة الجنازة أهم من العزا وهي اللي كل ما العدد زاد كل ثوابي ما كان أكتر، فأرجوكم تصلوا عليا مش شرط تيجي العزا وياريت لو اتعمل في البيت أو مكان بسيط بفلوسه تطلعوا صدقة جارية أفضل”.
وأضاف: “من فضلكم لم يثبت أو يتفق عليه عمل ختمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللي هتقروا فيه جزء فضوا نفسكم واقعدوا ادعوا فيه، بلاش صدقة جارية تقليدية وسهلة ومش مستفاد بيها يعني المصاحف كتير في مصر أوي، وكل بيت فيه كتير فممكن نحط الفلوس في جامع بيتبني أو كرسى متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة”.
وتابع الراحل: “دى نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا “وأبيضت عيناه من الحزن فهو كظيم”.
تعرف علي وصية الفنان الراحل تامر ضيائي
واستكمل:”أهم حاجة تاني هي الدعاء وبس والصدقة، من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية و تمشوا عشان تونسوني في ليلة زي دي، الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تانى”
وأضاف: “اللي بيحبوني يدعولي كتير عشان لو مفيش حد يدعيلي ودي مهمة أوي أوي أوي عاوز الكل يسامحني على أي حاجهة عملتها فيه بقصد لو بدون قصد”.
واختتم الراحل: “اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عند الموت ويسّر طلوع روحي وهوّن عليّ سكراتي فإني أحب أن أرحل في هدوء وسكينة و طمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين”.