كتبت: نجلاء علاء الدين
كشف الفنان أحمد صيام، سبب إصابته بسرطان الرئة، وذلك خلال لقائه ببرنامج الستات للإعلاميتين مفيدة شيحة وسهير جودة عبر قناة النهار، وأوضح أن سبب إصابته يرجع إلى كثرة التدخين.
وقال أحمد صيام: “أنا كنت مدخن شره جدًا، أحيانًا كنت بشرب 6 علب سجاير، ومستحيل تشوفيني من غير سيجارة، أول ما أصحى لغاية ما أفطر بشرب 6 أو 7 سجاير..جيت في لحظة صحيت من النوم بحس الدنيا مهزوزة وقتها قولت إيه اللي أنا فيه ده الوقت ده خوفت وقررت ماشربش سجاير، دخلت المكتب ورميت السجاير اللي عندي، وقولت مش هشرب تاني”.
أحمد صيام يكشف سبب إصابته بسرطان الرئة
وتابع: “روحت للدكتور أكشف وبعد ما عملت التحاليل والأشعة فجأة لقيته بيقولي فيه سرطان في الرئة، مرات أخويا دكتورة قالت لي لازم ناخد عينة ونحلل ونمشي في طريق العلاج..قولت لها لا هنحلل ولا هنعمل ومتجبيش سيرة لحد وهنسيب الجثة مقفولة لغاية لما نسلمها لأصحابها، وروحت للدكتور وقال لي الورم على فص من الفصوص الثلاثة اللي في الرئة اليمين وإحنا هندخل نشيل الفص ده كله، قلت له تمام”.
أحمد صيام: أخدت كيماوي بعد العملية الجراحية
واختتم حديثه قائلا: “مراتي وقتها عرفت هي وكل أخواتي ولما اتقال لي عندك سرطان حسيت إني مضغوط وهقع، وعيالي وقتها كانوا صغيرين بيبهات، وبعد شوية قلت لنفسي إيه المشكلة أخاف من الموت علشان إيه، عملت الجراحة وأنا داخل العمليات كنت بضحك وكل اللي حواليا قلقان وأخدت كيماوي بعد الجراحة، و3 جرعات وقائية، وكل 6 شهور بعمل فحوصات من 2007”.
