كتبت : مريم محمد
عبرت الفنانة فريدة سيف النصر عن استيائها الشديد من تدخل بعض الأقلام الصحفية في تفاصيل حياة الفنان، وتصيدهم للقطات من أجل صنع فرقعة إعلامية.
وقالت في تصريحات خاصة لـ أون مصر : “دول بستعبطوا يعني إزاي يعني ده هبل مش لاقيين حاجة يعملوها قلة أدب وعايزين يلفتوا النظر ويعملوا منشتات وقالك فريدة كل الكلام عليها اليومين دول وحكاية العتاولة فـ نعمل حدوتة”.
وأضافت: “عشان كده مش بحب أروح مهرجانات في ناس بتكون مزقوقة من ناس وفي ناس مش كويسة أي حد عاقل بيفكر في حد هيروح مهرجان حافي”.
وفي سياق متصل، نشرت فريدة سيف النصر منشور عبر حسابها على ” الفيس بوك” تتحدث عن جدل ظهورها حافية القدمين، كتبت: “والله زهقت ليه مركزين معايا أوي وبالكذب .. عشان كده مابحبش أحضر احتفالات آخر إشاعه أني حضرت المهرجان حافية من غير جزمة لامؤاخذة إيه العبط ده أنا مابرضاش أتكلم لكن لما كل المواقع تكتب كده لأنهم بينقلوا من بعض، طيب أنا ونازلة من باب العربية الكعب أتكسر إزاي ماحدش يسألني اتعودت خلاص على العيون الحلوة فـ بقيت رجل عالية ورجل واطية”.
وأضافت :”وربنا يخلي سمير فقيه الصحفي الكبير استقبلني ومسكني كتر خيره ومشي بيا كنت هروح والله، وفضلت متحملة وأنا مروحة قلعتها لاني هاقع بسبب الكعب معرفش أنهم سايبين الناس كلها بفساتينهم وبيصوروا رجلي مراقبين حتي انفاسي مع الأسف، بجد أهم حاجة عندي حب جمهوري أنتم بقى لحساب مين أعملوا ما بدالكم زهقت، أما الميك أب فأنا أصًلا حتي شغلي مابحطش إلا روج مابحبش الفوند تان خالص، وشعري طبعًا معمول بس لماه أنا ماما يا جماعة”.
تابعت:”بصوا بقى كفاية راي جمهوري هما بيحبوا طبيعتي وبساطتي، وفعلًا من تواضع لله رفعه، وأظن واضح وعلى فكرة أنا بلبس المناسب لسني ومكانته والحمدلله عجبكم وقولتم شيك إنما من غير جزمة ده هبل عيب بقى أرحموني بالمواقع، غيري بيجري وأنا بقف لكم عشان شباب ولازم تاخدوا فرصتكم هو ده الجزاء شكرًا وبكل اللي بيحصل ده أنا تريند على طول يا أولادي حافية بقى منكوشة أهو الحب من الله موتوا”.
